中壢五號倉庫藝文基地

【文、圖∕薛常威∕國立中央大學客家語文暨社會科學學系在職專班碩士】

 

　　台灣鐵路係縱貫歸隻台灣西邊逐隻大城市个重要交通工具，除忒火車做得載人載貨之外，在日本時代開始，逐隻火車頭旁脣全部有起一間一間當高當闊个倉庫。該央時，倉庫係用來暫放穀，放肥，還過其他貨物，再過用火車載到其它所在。背尾火車頭旁脣緊發展，緊鬧熱，人緊來緊多。穀摎肥就另外尋較庄下个所在來放。最尾嗄變到舊个倉庫沒用著，漸漸舊忒、壞忒，變到無人敢去該片行。



　　這幾年政府開始整理火車頭旁脣个舊鐵路局宿舍、閒置个倉庫，拿來活化再利用。像以前紹介過个「舊事生活」，就係竹東火車頭旁脣个舊宿舍整理翻起个。

　　中壢火車頭旁脣，共樣乜有恁樣形，81年歷史个「五號倉庫」。在重新整理以前，這係一間東南亞餐廳。中央大學客家學院碩士畢業个劉醇遠，自104年開始用桃園藝文陣線个名，在網路頂項，摎在地个後生人，用「藝術返鄉」、「桃園在地」做目標，摎這車頭脣个閒等無用著个倉庫租下來，重新整理，在107年正式開放，斯安到「中壢五號倉庫藝文基地」。



　　 「五號倉庫」在車頭旁脣，交通當方便，除忒做得分在地劇團、青年就業計畫、摎在地小旅行「旅壢」、文創品牌「澗仔力製造所」做共下工作个空間。80坪个空間，乜做得作展覽，還過分劇團表演，未來桃園市設計相關个學生，乜做得在這辦畢業展，舉辦文化相關个活動，推廣文化觀光，實踐桃園駐地、藝術留鄉个理念。

　　夢想看起來盡好，這群後生人也已煞猛，毋過這下堵著大問題係桃園鐵路地下化摎車頭愛改建，「五號倉庫」可能會共下分人拆忒。雖然鐵路局講，桃園鐵路地下化最少愛十年，在這十年內，建物還會保存。這群後生人還係希望這倉庫做得原地保存，故所今年2月27號重新發起中壢鐵路文化資產保存運動，希望關心在地文化个大家共下來加入連署。


　　
薛常威先生 聲檔 —　中壢五號倉庫藝文基地（四縣腔）





　

▲BACK